Aramaixo Herri Eskolak antolatuta Ir a kurrin kurrin saioa egin zuten atzo. Lur Gallastegiren Uda bat Senegalen liburua oinarri hartuta, liburuko hainbat pasarte irakurri eta denon artean liburuaren esanahia osatu zuten. Ondoren, afaria eta jaia egin zuten.
Bergarako Ndank Ndank elkartearen konpainia izan zuten eskolako irakasleek, ikasleek eta gurasoek. Afaltzeko menua izan zen: arroza, oilaskoa eta barazkiak, eta Senegalgo erara jan zuten –sardexka gabe–. Postrerako txokolatea bizkotxoekin izan zuten.
Afal ostea perkusio afrikar doinuekin girotu zuten. Beste behin, gorputz adierazpen aberatsa dutela erakutsi zuten Bergaran bizi diren senegaldarrek, eta baita aramaioarrek ere.
