Aramaioko Udalbatzak ohiko osoko bilkura egin zuen eguenean. Besteak beste, onartu zituzten talde soziokulturalak diruz laguntzeko 2023ko ekitaldiko deialdiaren oinarriak. 2023ko aurrekontuetan iaz baino 3.000 euro gehiago izango du partida horrek.
Bestalde, Aramaioko udalbatzak elkartasuna adierazi zion Aitor Montes medikuari. Historia medikoa euskaraz idazteko eta medikuek euskaraz lan egiteko eskubidearen aldeko adierazpena onartu zuen udalbatzak, aho batez –EH Bilduren zazpi boto–. Duela bi aste, medikuak berak salaketa jarri zuen historia medikoetan euskara erabiltzeagatik jasotako hainbat mezurengatik. Izan ere, Debagoieneko Ospitaleko anestesista batek mezu euskarafobo batzuk idatzi zituen Aramaioko paziente baten historia klinikoan.
