Oñatiko Txopekua plater tiroketako zelaian jokatu zen atzo, zapatuan, herriarteko txapelketako lehen kanporaketa. 32 bat tiratzailek hartu zuten parte eta Aramaioko Enrike Ullibarriarana izan zen onena platerak apurtzen: 25etik 24. Maiatzaren 7an, hurrengo domekan, Irungo San Marzial tiro eremuan fosa unibertsaleko Euskadiko kopan lehiatuko da taldeko beste sei bat kiderekin batera.
Aldaketak egin dituzte aurten Oñatiko Pago Uso elkarteak antolatzen duen herriarteko plater tiraketan. Orain arte inguruko herriak hartzen zuten parte eta aurten edonork parte hartzeko aukera eskaini dute. Horrela, Oñatiko, Antzuolako, Bergarako, Arrasateko, Aramaioko, Legazpiko, Zumarragako eta Urretxuko tiratzaileak ez ezik, Bizkaikoak ere lehiatu dira.
Lau kanporaketa izango ditu txapelketak; hurrengo hiru zapatuetan jokatuko dira beste hirurak, toki berean, izen ematea 15:30ean irekita. Tiratzaile bakoitzak puntuak lortuko ditue egiten duen lanaren arabera, eta amaieran, puntuak batutakoan, jakingo da txapelketaren irabazlea.