Itur-Zuri Emakume Elkarteak eta Aramaioko Feministak deituta elkarretaratzea egin zuten Martxoaren 8a aldarrikatzeko. Plazan elkartu ziren eta, besteak beste, landa eremuko emakumeen eskubideak aldarrikatu zituzten.
Helburu horrekin elkartu ziren asteburuan Aramaixon Euskal Herri guztitik etorritako 35 emakume, topaketa agroekofeministaren barruan. Nekazaritzarako eta abeltzaintzarako lurrak gero eta mendialderago daudela nabarmendu dute, eta landa eremuan gero eta zerbitzu gutxiago dituztela gaineratu. "Denon bizitzak erdigunean jartzeko, ezinbestean babestu behar dugu herri txikien etorkizuna", aldarrikatu zuten atzoko agerraldian. Komunitatea eta lurra defendatzen jarraituko dutela gaineratu zuten.