Arabako Bertso Kuadrilla arteko txapelketako lehenengo finalaurrekoa domekan jokatuko dute Aramaioko Izena Pentsau Bida eta Gasteizko Bertxilika taldeek. Aguraingo Zabalarten izango da; 18:00etan mokadutxoa izango dute eta saioa 18:30ean hasiko da.
Izena pentsau bida taldeko kideak Martin Abarrategi, Danel Herrarte, Manex Agirre eta Sabin Abarrategi dira. Bertxilika taldekoak berriz, Aroa Arrizubieta, Maddi Agirre, Hegoi Amabizka, Samuel Rodriguez eta Eukene De los Aires. Gai jartzaile lanetan Irati Martinez ariko da, eta saioa hiru epailek baloratuko dute: Iker Elexpuruk –Izena pentsau bida–, Txomin Elorzak –Bertxilika– eta Arabako Bertsozale Elkartearen izenean Ainhoa Aizpuruak.