Arabako bertsogintza saretzeko eta indartzeko umorea baino hoberik ez dago; hori erakutsi zuten atzo, Zabolan egindako bi bertso saioetan.
Sailkapena
Arabako Bertso Kuadrilla arteko lehenengo faseko azken saioak jokatu zituzten: batetik, Aramaioko Ibarrako Periferiak eta Arabar Errioxako Txandrio taldeak lehiatu ziren; azken horiek nagusitu ziren. Bestetik, Aramaioko Tratamendurik Gabeak eta Aiaraldeko Altubepekoak aritu ziren bertsotan; bigarren saioko irabazleak Altubepekoak izan ziren.
Atzo abestu ez zuen Izena Pentsau Bida taldeak bi saio irabazi ditu eta hurrengo fasera sailkatzea eskura du; Ibarrako Periferiak eta Tratamendurik Gabeak, aldiz, beste saioetako emaitzen zain egon beharko dira.
Bi saioen artean afaria egin zuten: 40 bat lagun elkartu ziren mahaiaren bueltan.
Plaza ona berriendako
Nabarmendu behar da lehiaketa hau egokia dela plazan lehen aldiz kantatzen duten bertsolariendako. Bada, Aramaiok lehiaketan dituen hiru taldeetan daude lehenengo aldiz abestu duten gaztetxoak. Atzo, esaterako, ausardia handiz eta lotsarik gabe aritu ziren Iraide Onaindia, Ane Arexolaleiba eta Gari Arexolaleiba.