Hondakinak ondo kudeatzeko kanpaina jarri du abian Aramaioko Udalak

"Pertsona guztiok erantzukizun indibidual eta kolektiboak" ditugula nabarmenduz, sortutako hondakinak ondo kudeatzeko kanpaina jarri du martxan Aramaioko Udalak. Ohar bidez emandako datuen arabera, hondar frakzioaren edukiontzitan –edukiontzi grisa– jasotako hondakinaren %50a jatorri organikoa duen hondakina da; hau da, konpostaje aukeren bidez kudeatu daitekeen hondakina . "Hondar frakzioa da gutxien sortu beharko litzatekeena; hori murrizten saiatu behar dugu, ondorengo kudeaketan sortzen diren zailtasunengatik", nabarmendu dute. Zailtasunez eta ingurumenari egindako kalteez gain, Udalak nabarmendu du kostu ekonomiko handia duela frakzioaren kudeaketak: "Apirilaren 8ko azken legearen arabera, plantan berreskuratu ezin den hondakina zabortegira bideratzen da, 30 euro tonako zerga aplikatuz". Udalek ordaindu behar dute zerga hori. Helburua da hondakinen kudeaketa txarra zergapetzea.