Arabako txotx garaia martxan da gaur eguerdiaz geroztik ofizialki. Askartzako Trebiñu Sagardotegian egin dute irekiera; hain zuzen ere, Paul Urkijo zinema zuzendariak izan du lehenengo txotxa egiteko ardura Trebiñun. Sagardo garaia nolakoa izango den ikusteko gogoz daude; izan ere, azkeneko hiru berezien ostean, murrizketarik gabekoa izango da aurtengoa. 2022ko sagar-biltzea zerbait aurreratu behar izan zuten, lehorteagatik. Aurtengo sasoian, berriz, Arabako hiru sagardogile nagusiek –Aramaioko Iturrieta Sagardotegia, Askartzako Trebiñu Sagardotegia eta Kuartango Sagardotegia– 60.000 litro sagardo edo sagar-zuku ekoiztu dituzte, iaz baino gutxiago –95.000 izan ziren–. Edozelan ere, nabarmendu dute Arabako sagardotegietako mahaietan 100.000 litro sagardo eskaini ahal izango dituztela, Bizkaiko eta Gipuzkoako sagardogileei esker.
Iturrieta sagardotegian lagun giroko ekitaldia egingo dute gaur, 19:00etan.
