Buzoi komunitarioak jarri dituzte herriko bi auzotan: Gantzagan eta Eguzkierripan. Hasiera batean,proiektu pilotu moduan jarri dituzte buzoiak aipatutako auzoetan. "Udalak auzoetan buzoi hauek jartzea aspaldi izan du gogoan, eta, Eguzkierripa auzokoek buzoiak jartzea eskatu zutenean, Gantzagarekin batera, proiektu pilotu bezala martxan jarri zen ekimen hau", azaldu dute ohar bidez.
Bi gune izango ditu
Eguzkierripan Andra Mari ermita baino gorago jarri dituzte buzoi komunitarioak. "Bi gunetan jarri ditugu: gune batean sei postontzi egongo dira eta bestean lau", azaldu du Udaleko zinegotzi Cristina Etxenausiak. Gantzagan, aldiz, gune bakarrean jarri dituzte; guztira, hogei postontzi. Mendialdean dagoen auzoa izanda, egoki ikusi dute horrelako proba bat egitea auzoan; modu horretan, banatzaileak arazo gutxiago izango ditu gutunak banatzerakoan.
"Correosek lehen zuen langileak alde egin zuenean, langile berriak baserriak ezin topatuta ibiltzen dira. Izan ere, Aramaio labirinto bat da", dio Etxenagusiak. Nabarmendu du postontziak jartzeko kostu guztia Udalaren kontu doala, horregatik poliki-poliki joango direla gainerako auzoetara zabaltzen.
Udalak gainontzeko auzoekin ere hitz egingo du buzoiak jartzeko aukera zabaltzeko. Izan ere, Udalak Correosekin izan dituen tirabirak saihestu nahi ditu, eta, era berean, Udalaren banaketa egitea erraztu.