Euskal Herriko Bertsolari Txapelketa Nagusiko laugarren saioa jokatu da gaur Gasteizko Europa biltzar etxean, eta Manex Agirre aramaioarrak seigarren postua eskuratu du, 573,5 punturekin.
Bigarren aldia du Agirrek txapelketa honetan, 2013an ere aritu baitzen. Bost bertsokide izan ditu alboan gaurko saioan, eta, Haritz Mujika izan da garaile, 695,5 punturekin. Haren ondotik geratu dira Miren Artetxe, 670 punturekin, Iban Urdangarin, 660,5ekin, Xabat Galletebeitia, 655,5ekin, eta, Amaia Iturriotz 648rekin.
Finalaurrekoetatik kanpo
Mujikak, beraz, finalaurreko saioetan bertsotan aritzeko aukera izango du, lehen itzuliko saioetako irabazleak zuzenean igarotzen baitira fase horretara. Hain justu, azken txapelketako finalistekin batera egingo dute bertsotan, besteak beste.
Gainontzeko bertsolariak zeintzuk diren, ordea, urriaren 9an jakingo da, orduan egingo baita lehen fase honetako azken saioa, Lizarran (Nafarroa). Dena den, jakinekoa da Agirre txapelketatik kanpo gelditu dela, ez baitu puntuazio nahikoa eskuratu aurrera egiteko. Izan ere, lehen itzuliko saioetan eskuratutako puntuazioaren arabera sailkatzen dira gainontzeko bertsolariak.
Are, Peru Abarrategi aramaioarra ere txapelketatik kanpo gelditu da arrazoi berberarengatik.