Untzilla auzoko jaiak ospatuko dituzte aste bukaeran. Bihar, barikua, 19:30ean hasiko dituzte jaiak kanpai-jotzearekin. Ondoren, bertso-afaria egingo dute elkartean Sustrai Colina eta Jesus Mari Irazu bertsolariekin.
Zapatuko ekitaldiak
Zapatuan, meza esango dute 12:00etan; ondoren, puzgarriak eta bazkaria elkartean. 16:00etan mus txapelketa egingo dute. Bikote bakoitzak 20 euro ordaindu beharko du izena ematerakoan. 17:30ean, umeendako Edu magoaren ikuskizuna izango dute eta ondoren txokolatada. Elustondo anai-arrebek jarriko dute iluntzean musika giroa; gainera, elkartean parrillada piztuko dute eta afaria zerbitzatuko dute.
23:00etan, Murumendi elkarteko XXXVIII. Bolo Txapelketa egingo dute. 10 euro ordaindu beharko du parte hartzaile bakoitzak. Sariak izango dira: lehenengoak garaikurra, txapela eta 200 euro; bigarrenak, garaikurra eta 150 euro; hirugarrenak 80 euro eta laugarrenak 50 euro. Gainera, Murumendi elkarteko lehenengo sailkatuari sari berezia emango zaio.
Domekan mendi irteera
Domekan, mendi irteera egingo dute elkartetik irtenda, 10:00etan. 12:00etan meza nagusia izango dute Aramaioko abesbatzak girotuta. Jaiak amaitzeko, 13:00etan, bermouth dantza egingo dute Elustondo anai-arrebek girotuta.