Gasteizko Infraganti boskoteak girotuko du barikuko arratsaldea Sastiña aurrealdean. Jazza, swinga, bluesa eta funka uztartzen ditu taldeak, Julia Butenko abeslariaren ahotsak lagunduta. Musika egiteko lau instrumentu izango dituzte: baxua, gitarra, saxoa eta bateria.
Azken urteetako ohiturari jarraituz, iraileko barikuetan izango dira emanaldiak: bihar hasi eta irailaren 23ra arte.
Denetariko estiloak
Lau emanaldi izango ditu aurtengo jaialdiak: irailaren 9an, El Callejon de Cachan hirukoteak egingo du emanaldia. Ironiaz eta kritika sozialaz jositako abestiak joko dituzte. Ana Sosoaga da taldeko abeslaria. Musika modernoaren errepertorioa duen ganbera abesbatzaz gozatzeko aukera egongo da irailaren 16an: Shuflled Choir Soul Proyect taldearekin. Irailaren 23an amaituko dute jaialdia, Gorrondatxe taldearekin. Euskal abestiak joko dituzte: eurenak eta baita bertsioak ere. 19:00etan izango dira saio guztiak.