Euskal selekzioaren ofizialtasuna eskatzeko mendi martxa egingo dute uztailaren 30etik abuztuaren 6ra bitartean. Zortzi etapa egingo dituzte eta horietako bat Aramaion amaituko da: abuztuaren 2an, hain zuzen. "Arratsaldean iritsiko dira eta ongi-etorria egingo diegu; guztira, 65 bat izango dira", azaldu du Aramaioko Udaleko Kultura zinegotzi Ana Martiarenak. Martxan parte hartuko dutenek frontoian egingo dute lo. Hurrengo goizean, gosaldu ondoren beste etapa bati ekingo diote: Aramaiotik irtenda, Besaidera, Kanpanzarrera eta Asentziora joango dira eta etapa Bergaran amaituko dute.
20 urteko esperientzia
2000. urtean hasi zen Esait euskal selekzioaren aldeko mendi martxa antolatzen. Azken bi urteetan ez dela egin kontuan hartuta, aurtengoa 20. aldia izango da. Esait desagertu zela 7 urte bete dira aurten, eta mendi martxak Gu ere bai ekimenarekin bat egin du, kirol guztietan ofizialtasuna eskatzeko.