Flamenkoa eta fitnessa batuko dituen eskola emango du Malena Lobok astelehenean: fitflamc saioa. Kiroldegian izango da, 18:30etik 19:30era bitartean, eta doan egingo du. Parte hartu gura duenak maledantza@hotmail.com helbidera idatzi edo 659 46 47 53 telefonora deitu behar du. "Oso dibertigarria izango da. Ariketak egingo ditugu: pisuarekin, sentadillak... Adin guztiendako izango da", azaldu du Lobok. Gaur egungo abestiez lagunduta egingo dituzte ariketak. Parte hartzeko, arropa erosoa, ura eta toallatxo bat eramatea gomendatu du. Loboren asmoa da irailetik aurrera eskolak ematea.