Gorbeialdeko Mintzalagunen eta Gurasolegunen topagune izango da Izarra ekainaren 18an. Euskara ardatz hartuta egun osoko jaia antolatu dute Gorbeialdeko Mintza Eguna ospatzeko.
Askotariko planak
10:30ean, plazan elkartuko dira eta bi plan izango dituzte aukeran: Gurasolagunek antolatuta jolasak edo Goiuriko ur-jauzira ibilaldia. 12:30ean, dantza erakustaldia izango dute Haize, Arantzabelako, Orbela eta Triskari dantza taldeen eskutik. Dantzak amaitutakoan, mintza-poteoa egingo dute herrian zehar. 15:00etan, herri bazkaria egingo dute; eguraldi ona bada Ostuñon eta txarra bada frontoian. Parte hartu gura duenak izena eman beharko du ekainaren 13a baino lehen, horretarako prestatu duten galdetegia beteta. Bazkariaren prezioa izango da 15 euro nagusiendako eta 10 euro 12 urtetik beherakoendako. Bazkalostean, kantu-saioa izango dute Joxe Mendizabalekin.