Maiatzeko ohiko osoko bilkuran onartu zuten, aho batez, kiroldegia berritzeko eta handitzeko braren exekuzioa kontratatzeko espedienteari hasiera ematea eta onartzea. Kontratuaren aurrekontua, BEZa barne, 470.183,65 eurokoa izatea onartu dute.
Zer egingo duten
Kiroldegia eraberritzeko eta handitzeko proiektua 2021eko iraileko osoko bilkuran onartu zuten. Azkenaldian materialek izan duten igoera handia dela eta, aurrekontua moldatu egin behar izan dute; hala, aurrekontua handitu egin dute, kontratazio lehiaketara norbait aurkez dadin.
Bi lan egingo dituzte: kiroldegiaren teilatua berritu egingo dute, egun dituen itogin arazoak konpontzeko. Izan ere, kiroldegia 80ko hamarkadakoa da eta ordutik ez dute teilatuan lanik egin. Bestalde, kanpoko frontoia estali egingo dute. "Estalkia jarriko zaio. Alboetatik zabalik egongo da, baina teilatua izango du", azaldu du Oier Ezkerra aparejadoreak. Egurrezko egitura izango du, eta txapazko teilatua. Modu horretan, eguraldi txarrarekin ere kanpoko frontoia erabilgarri egongo da, bai pilotan egin nahi dutenendako eta baita bertan jolasean ibili nahi duten gaztetxoendako ere.
Eguzki plakak
Kiroldegian egin beharreko beste lan bat eguzki plakak jartzea izango da. "Hori gerora eginbeharreko lana da, ez dago kontratazio honetan sartuta", azaldu du Ezkerrak. Proiektua egiten dabiltzala gehitu du. Asmoa da kiroldegiko teilatuan eguzki plakak jartzea, horien bitartez lortutako energia berriztagarriekin herriko eraikin publikoak hornitzeko.
Plataforma digitala
Kontratazio plataforma maiatzaren 27an argitaratu zen; eta proposamenak bitarteko elektronikoz aurkeztu beharko dira ekainaren 16ra arte, 14:00ak baino lehen.
