Promociones y Pavimentaciones Balgorza enpresari esleitu dizkiote lanak, 74.755,92 euroko aurrekontuarekin. Gaur dira hastekoak hilabete inguru iraungo duten lanak. Helburua da Nardeaga eta Pedro Ignazio Barrutia kaleen arteko elkargunea guztiz irisgarri egitea.
Egingo dituzten lanak
Besteak beste, ondorengo lanak egingo dituzte: oinezkoentzako pasabideen eremuetan dauden espaloien egungo beheratzeak aldatuko dituzte; ondoren, beheratutako pasabide horiek espaloiaren kota berean jarriko dira, espaloia eta galtzada mugatzen dituen egungo zintarria kendu egingo da; azkenik, aurreikusitako euri-urak biltzeko saretak egingo dira. Lanak egiteko espaloiaren eta galtzadaren zati bat hartuko dute; baina une oro egongo da oinezkoendako eta autoendako pasabidea. Urak biltzeko ubidea ere egingo dute.
Amaitzeko, kalea asfaltatuko dute eta dagokion bide-seinaleztapena egingo dute. Hori egiteko, egun batzuetan kalea autoendako itxita egongo da.