Manex Agirre, Xabi Igoa eta Peru Abarrategi, finalerdietara

Jon Irizar Aranguren 2022ko mai. 9a, 09:27
Abarrategi -erdian–, Igoa –eskuinetik hirugarrena– eta Agirre –eskuinean–, saioko talde argazkian. (Argazkia: Bertsozale Elkartea)

Asteburuan jokatu dira Dulantzin eta Zigoitian Arabako Bertsolari Txapelketaren XV. edizioko lehen bi final laurdenak. Lau aramaioar aritu dira kantuan; Paula Amilburu zapatuan, eta Manex Agirre, Xabi Igoa eta Peru Abarrategi domekan. Azken hiruak finalerdietan dira dagoeneko, eta Amilburu Aramaion bertan jokatuko den hirugarren final laurdeneko emaitzen esperoan da.

Asteburu oparoa izan da igaro berri dena Arabako bertsozaleentzat, eta hein handi batean, baita aramaioarrentzat ere. Izan ere, herriko lau bertsolari aritu dira kantuan Arabako Bertsolari Txapelketaren XV. edizioko lehen bi final laurdenetan, eta hiruk, gutxienez, finalerdietarako txartela eskuratu dute.

Amilburu, laugarren

Paula Amilburu izan zen taularatzen lehena. Asier Otamendi, Iñaki Viñaspre, Maddi Agirre, Rikardo Gonzalez de Durana eta Ekaitz Samaniegorekin batera, zapatuan Dulantzin egin zuen bertsotan aramaioarrak. Laugarren sailkatu zen Amilburu –230,5 puntu–, Otamendi –242 puntu–, Viñaspre –239 puntu– eta Agirreren –231 puntu– atzetik.

Amilburu, zapatuko saioan. (Argazkia: Bertsozale Elkartea)

Lehen hiruak Zigoitian

Kutsu aramaioarra izan zuen atzo Zigoitian jokatu zen bigarren final laurdenak; hots, sei bertsolarietatik erdiak debagoiendarrak izan ziren. Manex Agirre, Xabi Igoa eta Peru Abarrategirekin batera, Orlando Arreitunandia, Unai Mendibil eta Markel Yoller aritu ziren Oier Azkarragaren gaiei erantzun nahian. Saioa amaitzean, hiru aramaioarrak izan ziren lehen hiru sailkatuak: Agirre lehenengo –245,5 puntu–, Igoa bigarren –233 puntu–, eta Abarrategi hirugarren –232 puntu–. 

Aramaion hirugarren saioa

Hamabi bertsolari igaroko dira finalerdietara. Hala, jada jokatu diren bi final laurdenetako lehen sei sailkatuek ziurtatuta dute txartela; tartean dira Agirre, Igoa eta Abarrategi. Amilburu, aldiz, zapatuan Aramaion bertan jokatuko den hirugarren final laurdenaren esperoan da, hanka eta erdi hurrengo fasean duen arren. Zazpigarrena da sailkapenean, eta aski du maiatzaren 14ko saioko bertsolari batek 230,5 puntu baino gutxiago egitea txartela lortzeko.

Zapatuko saioari dagokionez, final laurdenetako bosgarren aramaioarra igoko da Kultur Etxeko oholtzara: Andere Arriolabengoa. 17:30etatik aurrera, Asier Rubio, Felipe Zelaieta, Manuel Bendala, Oihane Perea eta Unai Andarekin batera ariko da kantuan.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak