Iaz hasi ziren umore asteburuarekin. "Pandemia egoeraren ostean, zerbait egin behar zela erabaki genuen. Zerbait berezia nahi genuen, jendeari barre eragingo ziona", azaldu du kultura teknikari den Itxaso Aspiazuk.
Iaz egindako ekimenak arrakasta izan zuela ikusita, eta herritarrek erantzun ona eman zutela ikusita, aurten berriro ere umore jardunaldiei eustea erabaki dute. Formatu eta izaera bera izango du aste bukaerak; aldatuko den bakarra izena izango da: "Iaz Umore Asteburua izan zena, aurten AlgAramaio izango da".
Hiru ikuskizun antolatu dituzte: martxoaren 18an, barikua, Ind-Jones umeendako dantzaldia egingo dute, 17:30ean, kiroldegian. Hain zuzen, Gabon jaietarako programatuta zegoen dantzaldia baina egoerak behartuta atzeratu egin zuten.
Heldu zein familia
Martxoaren 19an, zapatua, helduendako Me too antzezlana egingo dute. Aitor Gabilondoren zuzendaritzapean Ainhoa Aierbe eta Tessa Andonegi aktore ezagunak igoko dira taula gainera. Feminismoa izango da antzezlanaren ardatza: feminismoaren inguruko kontzeptu, berba eta gauzen inguruan jardungo dute. "Kaos informatibo" horren aurrean Aierbek eta Andonegik argibideak bilatuko dituzte, bizitzea tokatu zaien "garai zoragarri" horri buruz. Sarrerak aldez aurretik erosi behar dira entradium.com atarian.
Domekan, martxoaren 20an, familiendako Txus & Txu antzezlana egingo dute. Antzezlan dibertigarria, hurbila, keinu bidezkoa... izango da, 55 minutu inguru iraungo duena. Trokolo teatro taldeko Aintzane Baleztena eta Ramon Marco izango dira aktoreak.
Dirua Aita Mari proiekturako
Ikuskizunetako sarrerekin lortutako dirua Aita Mari proiektura bideratuko da. Barikuko haurren dantzaldia doan izango da. Zapatuko antzezlaneko sarreraren prezioa 5 euro izango da; eta, domekako antzezlanarena 2 euro. Sarrerak online erosi.
