Osasun neurrien azken dekretua dela eta oharra kaleratu du Aramaioko Udalak.
Jaurlaritzaren azken dekretuak dioena jarraituz kultura eta kirol ekintzetan parte hartzeko Covid pasaportea beharrezkoa izango dela azaldu dute. Horrez gain, Udalaren ustez eraginkorrak diren beste neurri batzuk ere bete beharko dira: batetik, maskararen erabilera eta pertsonen arteko distantzia mantentzea; eta, bestetik aireztapen ona izateko karbono neurgailu batzuk erosi ditu Udalak. Horiek, gimnasioan, liburutegian eta ludotekan jarriko dituzte eta baita ekintza zehatzetan ere. Modu horretan, airearen kalitatearen arabera egingo da aireztapena.
Elkarretaratzea anbulatorio parean
Pandemiari aurre egiteko osasun sistema publiko indartsuaren beharra ere aldarrikatu dute. Hori horrela, herriko anbulatorioan eta Debagoieneko ospitalean jasaten ari diren murrizketak salatzeko elkarretaratzea egingo dute abenduaren 26an, 12:30ean, anbulatorio parean.
