Gazte mailako Burdinola Hockey taldeak Espainiako liga hasi berri du asteburuan. Madrilen izan dira hiru partidu jokatzen, eta emaitza onekin bueltatu dira bertatik. Agustin Oyanguren entrenatzaileak adierazi duenez, "hasiera ona" izan da.
Tres Cantos-en jokatutako lehen partidua Tsunamis taldearen kontra izan zen, eta lehen zatian lau gol lortuta, aurrea hartu zieten aurkariei. Bigarren zatian, Tsunamis taldeak bi gol sartu zizkion Burdinolari, eta azken minutuan lasaitasuna ematen zien gola sartuta, 2-5 izan zen emaitza.
Bigarren partidua Tres Cantosen taldearen aurkakoa izan zen. Burdinola aurretik jarri zen markagailuan lehen minutuan eta partidua kontrolpean izan arren, lehen zatiko azken sei minututan hiru gol jaso zituen Burdinolak. Hala ere, bigarren zatian eta partidua amaitzeko bi minuturen falta, berdinketa lortu zuen. Hala, 3-3 amaitu zen partidua.
Asteburuko azken partidua Lostregos Lucus taldearen aurka jokatu zuten, eta 7-1 irabazi zuten. Lehen zatia 3-1 bukatu zen, eta bigarrenean, berriz, tarte handiago atera zien aurkariei.
