Dagoeneko zabalik dago 2022an jokatuko den Arabako Bertsolari Txapelketarako izen-ematea. Irailaren 19ra arte egongo da horretarako aukera. Interesa dutenek araba.sustapena@bertsozale.eus helbidera idatzi edo 675 70 79 71 telefono zenbakira deitu beharko dute.
Urtarrilean, aurkezpena
Txapelketaren aurkezpena urtarrilaren hasieran izango da eta apirilaren 2a bitartean burutuko dira final zortzirenak, final laurdenak, finalerdiak eta finala. 2019ko edizioko finalistek txapelketan hasieratik kantatuko dute. Izen-emate kopuruaren arabera antolatuko dira lehen zortzirenak.
2021ean binakakoa
Osasun egoerak eraginda aldaketak egin zituzten azken txapelketan. Hala, bi urtetik behin egiten den Kuadrilla arteko zikloa hautsi eta lehenengoz binakako bertsolari txapelketa jokatu zuten. Gainera, nabarmendu behar da binakakoan Martin Abarrategi eta Manex Agirre aramaioarrak nagusitu zirela.