Elikabiraren barruan eskualdeko bost baserri edo etxalde bisitatzeko aukera izan dute kontsumitzaileek.
Jakiak nondik datozen ikuste aukera
Aramaioko Atxineta baserrian, adibidez, frutagintza eta abeltzaintza nola egiten duten ezagutu dute. Igor Asarta arduratzen da Atxineta baserrian ahabiaren ekoizpenarekin: "Orain dela 24 urte landatu genituen arbolak. Ahabiekin zukua eta marmelada egiten ditugu". Garrantzitsua da Asartarendako horrelako ekimenak egitea, kontsumitzaileek ikus dezaten erosten eta jaten ditugun jakiak nondik datozen. "Ahabiak, esaterako, garestiak dira. Hona etorrita, kontsumitzaileak ikus dezake zergatik diren garestiak. Ez da mahatsa bezala guztia era berean jasotzen, ez; heldutasunaren arabera jasotzen dugu. Hortaz, behin baino gehiagotan pasa behar izaten da arboletatik".
Dastatzea
Bisitan parte hartu dutenak ere gustura geratu dira. Ahabi arbolak ikusi ondoren, animaliak ikusteko aukera izan dute: behiak, ahuntzak eta oreinak dituzte Atxinetan. Eta, bisita amaitzeko dastatzea egin dute: ahabi zukua eta ahabi marmelada.
