Aramaioko Udalak bertan behera utzi ditu datarik edo epe zehatzik gabeko hitzarmenak. Udalak hainbat hitzarmen egin izan ditu herritarrekin eta eragileekin –udal bideen erabilera, ura...–. Baina Sektore Publikoaren Araubide Juridikoaren urriaren 1eko 40/2015 Legeak dio hitzarmenak ezin direla datarik gabekoak eta betierekoak izan.
Hori horrela izanda, bertan behera geratu dira datarik edo epea zehaztu gabe sinatutako orain arteko hitzarmen guztiak, berdin da zein den hitzarmen horien arrazoia edo izaera. Udaletik jakinarazi dute baten batek horrelako hitzarmenen bat sinatuta baldin badauka, eta uste baldin badu oraindik ere indarrean egon beharko litzakeela; adibidez, hitzarmena sinatzearen arrazoia gaur egun ere indarrean dagoelako, udaletxean eskaera ofizial bat egin beharko duela, hitzarmen zaharra eta hau berritzeko arrazoiak aurkeztuz. Udalak kasu guztiak aztertuko ditu.