Gaur, egubakoitza, ur parkearen denboraldia zabalduko dute. Udalak dagoeneko arautu du ur parkeak aurtengo udan izango duen ordutegia: eskolako opor egunetan, astelehenetik domekara bitartean, 11:00etatik 19:30era egongo da zabalik; eta eskola egunetan, astelehenetik egubakoitzera 16:30etik 19:30era eta zapatuetan eta domeketan 11:00etatik 19:30era bitartean.
Gunea errespetatzeko deia
Ur parkea "aramaioar guztiena" dela nabarmendu du Udalak, eta, horren harira, eskatu du, gainontzeko azpiegituren moduan, zentzuz erabiltzea eta errespetatzea umeen gune hori. Jende gehiegi pilatzen bada, txandak egiteko eskatu dute.
Ezin da ez jan ez edan
Ur parkearen erdian dagoen botoia sakatu behar da ura botatzen hasteko; 15 minutura geratu egingo da, eta, berriro erabili gura bada, berriro eman behar zaio botoiari. Ur parkeko ura ez dela edangarria nabarmendu dute; gainera, ezin da ez jan ez edan; ezin da kristalezko botilarik sartu; ezin dira ibilgailuak sartu; eta ezta animaliak ere.
