2020ko likidazio positiboa aprobetxatuta, 2021eko aurrekontuari 424.324,11 euroko txertaketa egitea onartu zuen udalbatzak, aldeko sei botoekin eta EAJko bi zinegotzien kontrako botoekin. 2020an 24.000 euro gehitu zitzaion soberakinari: egun, Udalaren soberakina 1.641.454,35 eurokoa da. Eta soberakin horretatik, aipatutako kopurua txertatuko zaio aurrekontuari.
Proiektu nabarmenenak
Egoera finantzario ona aprobetxatuta "dauden beharrak eta eskaerak" bete nahi dituzte, herritarren bizi kalitatea hobetzeko. Txertaketa horretako proiektu aipagarrienak dira: irisgarritasuna hobetzea kultura etxearen, okindegiaren eta goiko bi tabernen inguruan; Kurtzeaga-Karobia-Andra Mari ibilbidean zati bat bide berde gisa egokituko da eta beste zati bat porlanez jarriko da; liburutegian Aramaioko fondo berezia sortuko da; agertoki txiki modularra erosiko da; ur sarean inbertsioak egingo dira; eta hainbat errepide asfaltatuko dira.
