Aramaioko Udalak Kasatxo inguruan gertatutakoa salatu du. Kasatxo elkarteko eraikin pribatuan egindako pintaketek zentzurik ez daukatela azaldu dute, eta nabarmendu dute zentzu gutxiago daukatela inguruko 8-9 zuhaitzei egindako kalteak.
"Inguru horretako zuhaitzek 2019ko maiatzean ere antzerako eraso bat jasan zuten, nahiz eta oraingoan ez dakigun denak bizirik mantendu ahalko diren. Orain dela 2 urte bezala, gertaera hau Ertzainetan salatu du Udalak eta Urkiolako parke naturalekoei eta Foru Aldundiari jakinarazi", azaldu dute ohar bidez.
EAJren mozioa
Gertakari hori salatzeko, EAJko zinegotziek mozioa aurkeztu zuten egueneko osoko bilkuran. Jeltzaleek hiru puntuko mozioa aurkeztu zuen; horietatik bi puntu onartu zituen Udalbatzak.
1. "Aramaioko Udalak gogor gaitzetsi du hilaren 23an Etxaguenen Kasatxo inguruan izandako gertakariak; izan ere, ezezagun batzuek pintaketa kriminalizatzaileak egin zituzten eta gutxienez zortzi zuhaitz kaltetu zituzten".
2. "Udalak salaketa jarriko du Ertzaintzaren aurrean, Udalaren jabetza delako eta Urkiolako parke naturalean kalteak izan dituelako".
