Manex Agirre eta Martin Abarrategi Legution izango dira bihar, Arabako binakako txapelketako finalean. Saioa 17:30ean hasiko da, Legutioko kiroldegian.
Sarrerak bertsosarrerak.eus atarian eros daitezke. Aramaioko bikoteaz gain, finalean arituko dira Iñaki Viñaspre eta Unai Anda bikotea eta Manuel Bendala eta Oihane Perea bikotea.
Herrikide izatearen indargunea
Abarrategik dio "gogotsu" daudela finala jokatzeko. Bikote moduan euren indargunea herrikide izatea dela dio: "Aurrez ezagutzea eta daukagun konfiantza". Agirre finalera saio txukuna egiteko gogoz doa: "Txapelketa honek zerbait ona izan badu, niretzat, bikotekidea izan da. Martin bertsotan sendo dabil, zuzen, umore puntu bizi batekin ere bai. Horrek bultza egiten du, eta gauzak hobetzeko gogoa ematen du". Abarrategik nabarmendu du ez dela kasualitatea finaleko saioan oholtza gainean Arabako hiru txapeldun egotea.
Finaleko aurkezleak Nieves del Alamo Gil eta Eli Plazaola Zubizarreta izango dira.
