Lehen aldiz egingo dute horrelako lehiaketa bat.
Balkoiak, arnasgune
Azken urtean balkoiek indarra hartu dute egunerokoan. Etxean nahi baino denbora gehiago pasa beharrak eragin du balkoia izatea etxeko arnasgunea. Izan ere, balkoiek garrantzia hartu dute; batez ere, erdigunean bizi direnendako. "Balkoiek garrantzia hartu dute gaur egungo egoeran. Ekimen honekin, balkoien garrantzi hori nabarmendu egin nahi izan dugu, eta proposatu dugu sariketa bat egitea", azaldu du Udaleko Kultura teknikari Itsaso Azpiazuk.
Lehiaketan parte hartzeko udaletxean izena ematea ezinbestekoa izango da. Balkoiek, leihoek eta atariek ekainaren 1etik 23ra bitartean, gutxienez, apainduta egon beharko dute; gainera, parte-hartzaile bakoitzari txartel bat emango diote zenbaki batekin, eta txartel hori ikusgai izan beharko du lehiaketak irauten duen bitartean.
Kontuan hartuko dituztenak
Epaimahaiak irizpide hauek hartuko ditu kontuan: originaltasuna, apainketaren kalitatea, erabili diren loreen iraunkortasuna, harmonia eta diseinua, eta erabilitako materiala; material birziklatua erabiltzea baloratu egingo dute.
Antolatzaileek badakite ez dela gauza bera balkoia, leihoa edo ataria apaintzea: horregatik, bi kategoria bereiziko dituzte.
Sariak, kategoriatan banatuta
Leihoen eta balkoien kategorian sari bakarra egongo da, 200 eurokoa; eta atarien kategorian ere sari bakarra, 200 eurokoa; gainera, parte-hartzaile guztien artean 50 euro zozketatuko dira. Herriaren itxurari egindako onura da lehiaketaren xedea
