Martitzenean iritsiko da 'Kutxa bira' Aramaiora

Arantzazu Ezkibel Galdos 2021ko api. 22a, 18:00
Ekimenaren aurkezpena. Argazkia: Kutxa Bira.

Diaspora eta Euskal Herria batuko dituen ekimena martitzenean iritsiko da Aramaiora. Herritarrek aukera izango dute Aramaioko mezua sortzeko. Ametsak eta aldarrikapenak batzeko helbide elektronikoa jarri dute. Mezuak domekara arte bidal daitezke.

Diaspora eta hainbat euskal herri euskararen inguruan batzeko helburuarekin abiatu zuten Argentinan, martxoaren 20an, Kutxa bira. Ekimena Iparra-Hegoa elkarteak antolatu du, eta martitzenean, apirilaren 27an, Aramaiora iritsiko da. "Euskararekiko jarrera emozionala berreskuratu nahi da, aurten ez delako ekitaldirik egin, Korrika, esaterako", azaldu du Aramaioko lan taldean diharduen Iker Elexpuruk.

Jendearen sentimenduak batu nahi dituzte

Ekimenaren oinarria egurrezko kutxa bat da. Kutxa horren barruan mezu bat egongo da eta aramaioarrek euren mezua sortzeko aukera izango dute. Horretarako, aramaioarren ametsak eta aldarrikapenak batu nahi dituzte: mezua bidali nahi duenak apirilaren 25erako egin beharko du, aramaixokutxabira@gmail.com helbidera mezua idatzita. Argazki edo bideo bidez ere egin daiteke, horizontalean grabatuta.

Martitzenean, erretreta

Martitzenean, 11:00etan, San Martin eskolan egingo zaio harrera kutxari. "Prudentzio deunaren bezpera dela kontuan hartuta erretreta joko dute, eta Amets Arzallusek egindako manifestua irakurri", azaldu du Elexpuruk. Horrez gain, eskolako mezua sartuko dute. 18:30ean, aldiz, ekitaldia egingo dute parkean. Manifestua irakurriko dute eta Aramaioko mezua irakurri eta kutxan sartuko dute. Musika, dantza, bertsoak... egongo dira.

Ekitaldi guztia grabatu egingo dute.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak