San Martin herri eskolaren izena aldatu edo ez erabakiko dute bihar eskolako eragile ezberdinek. Orain dela bi urte, eskolako guraso elkarteak eskolaren izena aldatzeko proposamena egin zuen; eta, aurtengo ikasturtean, Elkarbizitza batzordetik ikasleen ordezkariei proposamenaren berri eman zaie. Ikasleek gaiaren inguruan hausnartu dute, eta, behin hori eginda, Eskola Komunitateari helarazi diote proposamena.
Izena aldatzeko arrazoiak
Bi arrazoi nagusi daude izena aldatzeko: lehenengoa da txarto ulertuak egoten direla izenarekin. San Martin izeneko beste eskola bat ere badago, eta gertatu izan da erositako materiala edo ordezko irakasleak Aramaiokoa ez den beste eskolara joatea; bestetik, kontuan hartu dute San Martin santu izena dela, eta, gaur egun, santuarena ez den beste izen bat aproposago ikusten dute, batez ere, ikasleek.
Bi arrazoi horiek aintzat hartuta bozkatu beharko dute izena aldatu nahi duten edo ez.
Komunitatea
Eskolako komunitatea osatzen duten guztiek izango dute bozkatzeko aukera. "Langile guztiek, ikasleek, gurasoek eta baita udal ordezkariek ere", azaldu du eskolako zuzendari Saioa Uriartek. Bihar, eguena, egingo dute bozketa. Ikasleek eta langileek eskolako gimnasioan bozkatu beharko dute, 10:30etik 12:00ak bitartean. "Bestalde, eskolara etorri ezin direnek inprimaki bat bete beharko dute. Guraso Elkartekoek bideratu dute inprimakia: horiek ere gaur bozkatu beharko dute, 14:00ak arteko tartearekin", dio Uriartek.