Aramaioko Udalak oharra argitaratu du anbulatorioko egoeraren harira. Atzo, eguena, batzartu ziren zinegotziak gertatutakoaren inguruko informazioa eskaintzeko.
Zerbitzua
Batetik, Aramaioko anbulatorioko zerbitzuaren egoera azaldu nahi izan dute, izan ere mediku titularra bajan dago: "Gure anbulatorioa Debagoieneko Ospitalearen parte da, eta bertatik eramaten dute eskualdeko kudeaketa. Beraiekin harreman zuzena dugu eta baja hau bere osotasunean betetzeko ahalegin guztiak egiten ari dira baina egoera honetan, gerta daiteke egunen batean edo bestean medikurik ez egotea. Horrelako kasu baten aurrean, ahalik eta hoberen betetzen ahaleginduko dira zerbitzua eta, behar denean, egoeraren berri komunikatuko da. Zentzu honetan, eskerrak eman nahi dizkiegu osasun langileei".
Pintaketen harira
Bestetik, atzo anbulatorioan egin zituzten pintaketen harira zera azaldu dute: "Zerbitzuarekin eta bertako langileekin zerikusia duten pintaketa horiek ez ditugu ulertzen. Ez gaude ados gertatu denarekin eta uste dugu horrelako zentzugabekeriak kalte besterik ez diotela egiten gure herriari eta zerbitzuari; kalte soziala zein materiala. Nolanahi ere, argi utzi nahi dugu ez ditugula horrelako ekintzak onartzen”. "Aurrera begira, orain arte bezala, zerbitzua mantentzeko, gure esku dauden egin beharreko gestioak egingo ditugu eta dakigunaren berri emango dugu, momentu bakoitzean", azaldu dute.
