Tailerra 10:00etatik 14:00etara bitartean izango da, eta aurrez eman beharko da izena berdintasuna@gorbeialdea.eus helbidean. 10 lagunendako lekua egongo da.
Gizon itxura eta jokaera
Gorbeialdeko berdintasun teknikari Jone Unzagak azaldu du Drag King kontzeptuaren esanahia: "Emakume bezala definitua izan dena gizon itxuraz janztea eta jokatzea litzateke. Askotan, ezagunago egiten zaigu Drag Queen hitza, telebistan eta pelikuletan emakumezkoen irudia hartzen dituzten gizonezkoak ikusi ditugulako. Kasu honetan alderantziz egingo dugu".
Drag King tailerrean maskulinotasuna eraldatzeko behar diren teknikak azalduko dituzte. Itxura, hitz egiteko modua, espazioa eta gorputzaren adierazpena landuko dituzte. "Ez da antzerki-ariketa bat, praktika politiko bat baizik, non jaiotzean emakume gisa diagnostikatutako gorputzak maskulinitatea debekatua izan duten", azaldu du Unzagak. Nori zuzendutako tailerra den galdetuta, zera dio teknikariak: "Euren bizitzako uneren batean emakumeen sozializazioa bizi izan duten pertsonekin egiten dira tailerrak; beraz, jaiotzean emakumea diagnostikatu dituzten orori irekita dago".
Eraman beharrekoak
Tailerrean parte hartuko dutenek eraman beharko dute gizon arropa: galtzontziloak eta baita gizonentzako egindako galtzerdiak ere. "Goitik behera gizon arroparekin jantzi ahal izan behar dira", dio Unzagak.
