Arabako bertsolari gaztetxoen 25. eskolartekoa hasi zuten, atzo, barikua. Oinak buruan izena duen Arabako txapelketak hiru saio izan zituen, atzo; horietako bat Aramaioko Zabola elkartean jokatu zen. 14 eta 18 urte bitarteko gazteak aritu ziren kantuan, eta, bertan aritu zirenetatik, urriaren 10eko finalean Danel Herrarte, Gari Arexolaliba eta Aitor Ugarte izango dira.
Aramaioko Zabola Elkarteko saioaz gain, aldi berean Gasteizko Amaia Zentroan eta Aguraingo AEKko euskal txokoan ere izan ziren saioak. Bertan ere, Arabako bertso-eskoletako 14 urtetik 18 urtera bitarteko 18 gaztek parte hartu zuten, lagun arteko giroan.
Urriaren 10ean finala izango da 12:00etan, sei bertsolarirekin, Kuadrillarteko bertso txapelketako finalarekin bat eginez, egun eta toki berean. Hortaz, Arabako bertso mugimendua elkartuko da Murgian, eta ikasturtea gogor hasiko dute Arabako bertso-eskolek.
