Ez Sagardo Egunik, ezta sagarrik ere. Horrelakoa izango da aurtengo urtea. Aramaioko Udalak erabaki du azkeneko urteetan arrakasta handiz antolatu izan den Sagardo Eguna ez antolatzea. "Ez dauka zentzurik. Basoa saldu eta sagardoa edan, talo postua... Egun bizi dugun egoeran ez du zentzurik jai hori antolatzeak", azaldu du Lierni Altuna alkateak.
Aramaioko Sagardogile Elkarteko (ASE) presidente Jose Miguel Maskarianok dio aurten ez dagoela "batere sagarrik". Hori zergatik den galdetuta, Maskarianok ez dauka argi: "Ez dakigu, izan daiteke eguraldiagatik edo izan daiteke sagarrak bi urtean behin izaten direlako... kontua da ez dagoela sagarrik". Hori horrela, ASEk erabaki du elkartean duten makineria martxan jarriko duen langilerik ez kontratatzea aurten. Gaur egun, Aramaioko elkartean 22 sagardogile daude: Aramaiokoez gain, inguruko herrietako sagardogileak ere badaude elkarte horretan.
