Idoia Asurmendik, Maria Izagak eta Bea Asurmendik emanaldia eskainiko dute, eguaztenean, 19:30ean, parkean. "Hirurok elkarrekin abestuko dugu. Abesti batzuetan batek abestu egingo du eta beste biek koruak egingo dituzte, adibidez", azaldu du Bea Asurmendik.
Erreferente diren musikariak
Nabarmendu du bertsioak abestuko dituztela, "gustuko" dituzten abestiak: "Denetik egongo da. Idoiak folk eta country musika du gustuko; Mariak soulera jotzen du; eta ni jazzarekin nabil azkenaldian". Euskarazko abestiak ere eskainiko dituzte, jendearentzat ezagunak direnak: "Baina, batez ere, guri gustatzen zaigun musika izango da. Guretzat erreferente direnak".
Hiru abeslariak Papargorri abesbatzatik datoz: "Elkarrekin ibilitakoak gara Papargorrin". Aramaioko abeslarien mailaz galdetuta, Asurmendik dio ez dakiela nondik etor daitekeen zaletasun hori: "Egia da izugurrizko zaletasuna dagoela. Abesbatza ere badugu, baina ez dakit nondik datorren zaletasun hau". Musikarekiko zaletasunak iraun dezala Aramaion.
Bea Azurmendi: Londresen zazpi urte
Irailean zazpi urte beteko ditu Londresen bizi izaten Bea Asurmendik. Musika ikasketak egitera joan zen eta han jarraitzen du ibilbidea egiten. Goienak elkarrizketa egin dio.
Nolako egoera bizi duzue han?
Emanaldi guztiak bertan behera geratu zaizkigu, eta martxoaz geroztik agertoki batera igo gabe nago. Uste dut lehenengo aldia dela horrenbeste denbora egiten dudana emanaldirik eskaini gabe.
Guildhall musika eskolan master bat hasiko duzu.
Irailean hasiko dut. Abenduan egin nuen azterketa eta aukeratua izan nintzen.
Zer eskainiko dizu masterrak?
Musika munduan hazteko balioko dit. Kantu teknikaz gain, konposatzen ikasteko balioko dit.