Gorbeialdeko Kuadrillak Bertso abentura antolatu du: irailaren 2an, 3an eta 4an egingo dute ekimena. Pazko astean egin ohi izan den bertso barnetegiaren ordezkoa izango da irailekoa.
Hiru egunetan, hiru herritan
Udaleku irekietan moduan, ekintza ezberdinak egitea aurreikusten dute: hiru herritan eta hiru egunetan. 10 eta 13 urte bitarteko gazteei zuzendutako ekimena izango da. Aramaion, Legution eta Murgian egingo dute, 10:00etatik 13:00etara.
Aurrez eman behar da izena
Ekintza doako izango da baina aurrez eman beharko da izena, bertsozale.eus atarian: uztailaren 10a izango da horretarako azken eguna. Autobus zerbitzua egongo da.
Herri ezberdinetako haurrak, eskualdea eta ingurunea ezagutu, bertako bertsolarien bisita jaso eta hitzarekin jolasteko aukera paregabea izango dute parte hartzaileek.
