Azokak ere itzuli dira normaltasun berri honetan, eta horren adierazle izan da gaur Aramaion egin duten Lorabarri azoka. Herriko eta inguruetako ekoizleak batu dira Bizente Goikoetxea plazan, euren produktuak (gazta, gatza, sagardoa, ozpina, barazkiak, pasta, garagardoa, txokolatea...) herritarrengana gerturatzeko asmoarekin. Eta giro polita sortzea lortu dute, azkenean, eguraldia lagun izan baitute Aramaion, eta erosleak "produktuak zuzenean erosteko gogoekin" agertu baitira, ekitaldia antolatu duen Aramailur elkarteko kideek azaldu duten moduan.
Ekoizleendako ez dira hilabete errazak izan, salmentak orokorrean behera egin dutelako, eta azokak antolatzearen beharra nabarmendu dute. Konfinamendu garaian, gainera, askok etxez-etxeko salmenta antolatu behar dutela aipatu dute, eta nahiz eta jakien produkzioak ez duen hainbesteko kalterik izan, "guztiendako garai gogorra" izan dela azpimarratu dute.
Bihar, Lorabarri asteari amaiera emateko, Salaberri hariztira bisita gidatua egiteko aukera izango dute aurrez izena eman duten herritarrek.
