Egoera berezia bizitzen ari dira azokak aurten; eta, ondorioz baita ekoizleak ere. Urtero egiten den Lorabarri azoka aukera ona izaten da herriko ekoizleentzat euren produktuak atera eta saltzeko. Maiatza inguruan egiten da Lorabarri azoka, Aramailur elkarteak antolatuta. Aurten, baina, atzeratu egin behar izan dute egoerak hala behartuta.
Denboran berandutxoago bada ere, egitea erabaki dute, aurten zortzigarrenez. Hala adierazi du azokako antolatzaile ibiltzen den Irati Mujikak: "Azokak egitea posible dela ikusita, erabaki dugu egitea. Izan ere, uste dugu, aprobetxatu behar dugula bertako ekoizleei merezi duten babesa erakusteko".
Azoka: Bixente Goikoetxea plazan
Bihar, zapatua, egingo dute azoka, Bixente Goikoetxea plazan: "Estalpe bat jarriko dugu eta bertan izango dira Aramaioko ekoizleak eta baita kanpotik etorriko direnak ere: guztira, 10 inguru. Musika ere izango dugu goiza girotzeko" .
Bertokoa kontsumitzeko aukera
11:00etan hasiko dute azoka eta erakusmahaiak egongo dira jarrita 14:00ak arte. "Herriko barazkiak, marmeladak, gatza, zukua, artzain gazta..." jarriko dute salgai. Herritarrak bertokoa kontsumitzera animatu nahi ditu Mujikak. Modu horretan, "ingurunea ezagutuz, bertokoa janez, bizitza zainduz".