Lorabarri asteburuaren barruan zapatuan azoka egingo dute, eta domekan irteera gidatua egingo dute Salaberriko agestoira –hariztira–. Errez kooperatibako Markel Arriolabengoa baso ingeniariak gidatuko du saioa: "Salaberri hariztia udalaren esku utzi zuten 2015ean; eta, konpromisoa hartu zen hariztia zaindu eta hobetzeko".
Ekosistemak dituen dinamikak ezagutzea
Asmoa izan da interpretaziorako eremu bat sortzea, Aramaioko basoek izan duten bilakaera historikoa ikusi eta interpretatu ahal izateko. Horrez gain, "ekosistemak dituen dinamikak" azalduko dituzte domekako bisitan.
15 laguneko taldeak izango dira
Irteera egingo dute bi taldetan banatuta eta bi bisitak euskaraz izango dira. Lehenengo txanda 10:00etan abiatuko da kiroldegitik; eta, bigarrena abiatuko da 12:30ean. Txanda bakoitzean 15 lagunendako tokia egongo da. Bisita gidatuan parte hartu gura duenak izena eman beharko du 945 445 016 udaletxeko telefono zenbakian.
Bisita egiteko ez da behar ezer berezirik; arropa erosoa eramatea gomendatu dute eta euria egingo balu euritarako aproposak diren oinetakoak.