Otsaila gerturatu ahala, urteroko usadioak berritzeko prestatzen hasteko garaia da, eta horixe da herriko lau kultur eragilek egin duten deialdiaren helburua ere. Datorren hilaren lehenean, zapatuarekin, egingo da Aramaion santa-eske herrikoia –otsailaren 5a da Santa Ageda eguna–, eta bi entsegu egingo dituzte aurretik.
Bertso Eskola, Papargorri abesbatza, Bizente Goikoetxea abesbatza eta Triki Kalejira taldea dira ekimenaren antolatzaile, eta entseguak deitu dituzte santa-eske aurreko bi eguenetarako, urtarrilaren 23 eta 30erako. 19:00etan izango dira, Sastiñan.
Egunean, bazkaria
Otsailaren 1ean, 10:00etan plazatik abiatu eta Aramaioko hainbat auzotan ibiliko dira kantuan, ohitura zaharra berrituz, eta parte-hartzaileak Iturrieta sagardotegian batuko dira 14:00etan, bazkaltzeko.
Bazkarirako izena lehen entseguan eman beharko da. Helduek 20 euro ordaindu beharko dute, eta umeek 15.