Umeek oporrak hartu eta Gabon ostean itzuli arteko tartea San Martin eskolan hainbat apurketa egiteko aprobetxatu du zenbaitek. Honela, zenbait kristal apurtuta agertu ziren, eta eskolako jolastokiko sabaian ere modulu batzuk apurtu zituzten.
Aramaioko Udalak "gogor" salatu gura izan ditu jarrera eta gertakariok: "Itxuraz, batzuek ez dute denbora pasatzeko modu hobeagorik! Guztion ondarea den hori apurtzen ibiltzen direnen jarrera salatu behar dugu. Guztion ardura da herria eta herrikoa zaintzea eta mantentzea". Konponketa lanak egin ditu dagoeneko Udalak.
Eskolan ere kezkatuta
Eskolako zuzendari Saioa Uriartek gogora dakar ez dela halakoak gertatzen diren lehen aldia: "Duela urte eta erdi inguru ere apurtu zituzten kristal batzuk".
Gertakarion aurrean, salaketarik ez dute jarri, baina aurrera begira nola jokatu aztertu beharko dutela aitortu du Uriartek, eta Lierni Altuna alkatearekin batzeko gogoa ere adierazi du.
