Lau eta erdiko torneoa jokatzen hasi berri dira, eta joan den asteburuan Amezketako jardunaldiak erakutsi zuen pilotari kopuruak gora egitearekin batera pilotarien kalitatea ere goraka doala. "Nabari da, urtez urte, pilotarien mailak gora egiten jarraitzen duela, bai pilota mistoarekin, bai pilota goxoarekin, eta giroak ere ez du behera egin, Amezketako Larrunarriko harmailetan ez zeneta jenderik falta izan", adierazi dute antolatzaileek. Eta domekarako beste horrenbeste espero dute, Aramaioko harmailak jendez betetzea, alegia.
Sei partidu
Aramaion Janire Arrizabalaga, Irene Urzelai, Onintza Egaña, Naiara Aldasoro, Gentzane Alddai, Maialen Magunabeitia, Irantzu Etxebeste, Uxue Azkonobieta, Amaia Zarrabeitia, Ana Maria Agilera, Izaro Zinkunegi eta Nerea Sagarna lehiatuko dira lau eta erdiaren barruan.
Madalen Etxegarai, ondo
Bestalde, joan den astean, Amezketan, iaz eskuz binakakoan nabarmendu zen Madalen Etxegarai izan zen nagusitu zen pilotarietako bat. Oñatikoa eroso gailendu zitzaion Amurrioko Amaiur Pikazari (18-1). Hala, kanporaketa horretan, Madalen Etxegaraik, Laia Salsamendik, Andrea Capellanek eta Ane Mendiburuk egin zuten aurrera, eta baita Maddi Berrocalek eta Madi Unanuek ere, galdu arren tanto gehien egin zituzten pilotariak izan ziren eta. Pilota goxoekin, Andrea Aldaregiak eta Maria Granadok egin dute aurrera.
