Iazko denboraldian lortutako emaitza onen haritik, maila bat gorago –brontzezko mailan, hain zuzen– estreinatuko da taldea, etzi. Aramaion bertan hasiko dute denboraldia, eta Dinamo Lakuabizkarra talde gasteiztarra izango dute aurkari. Are, Pello Abarrategi taldeko jokalariak azaldu bezala, aurkari guztiak izango dira gasteiztarrak: "Kanpoan jokatzen ditugun partidu guztiak hiriburuan izango dira".
Hamalau jokalari arituko dira taldearekin jokatzen –horietatik lau berriak dira–. Adinari dagokionez, 18 eta 25 urte bitarteko gizonezkoak dira guztiak.
Antolaketa, guztien artean
Norgehiagokak prestatzeko astearte eta ostegunetan elkartzen da taldea, entrenamenduak "irekiak" izaten diren arren: "Areto futbolean jokatzeko gogoa duen edonor gerturatu daiteke saioetara". Gainera, entrenatzailerik ez dute; taldekideak arduratzen dira taldearen antolaketa egin eta norgehiagoka bakoitzean nork jokatuko duen erabakitzeaz. "Txandakatu egiten gara, normalean", argitu du Abarrategik.