Aitor Ugarte mendi korrikalariak egin du Aramaioko Sagardo Egunari hasiera eman dion txotx irekiera. Bertsotan ere egin dute eta dantza ere bai –tartean sagar dantza–, herritarrek sagardoa eta sagar zukua dastatzen zituzten bitartean. Jatekorik ere ez da falta izan, Lagun Artean dantza taldeko kideek taloak egin baitituzte.
Zortzi etxe
Etxeko sagardoaz gozatzeko aukera aprobetxatu dute aramaioarrek eta ekoizleak ere pozik ziren, kalera euren ekoizpena eramateko aukera oso polita iruditzen baitzaie. Iazko sagar-uztak emandako sagardoa da gaur plazara eroan dutena, uzta urri batetik ateratakoa: "2018an apenas egon zen sagarrik, baina ateratako zukua kalitatezkoa da. Aurten, berriz, sekulako sagar pila dago. Berehala hasiko gara uzta berriarekin lanean", dio ekoizleetako batek.