Arabako klubetako 45 bikote inguruk eman dute izena aurtengo San Martin pilota txapelketarako; horietatik, hainbat izango dira Aramaiokoak bertakoak, infantil B kategorian salbu, beste guztietan izango du-eta ordezkaritza herriak.
Benjamin, alebin, infantil eta kadete mailetan jokatuko da txapelketa, nahiz eta kategoria beraren barruan A eta B azpimailak egongo diren –kasu batzuetan, pilotetan egongo da aldea batetik bestera–. Partiduak bariku arratsaldeetan eta domeka goizetan jokatuko dira, gaur hasi eta astero-astero azaroaren 9ra bitartean.
Txapelketa ligaxka moduan jokatuko da lehenengo zatian: kategoriaren arabera, baina multzo bat edo bi egongo dira, oro har, bakoitzean, eta lauzpabost bikote ariko dira lehian multzoko.
Lehen asteburua
Txapelketaren lehenengo asteburuan, hamabi norgehiagoka egongo dira, bost gaur eta domekan gainerako zazpiak.