Julio Galartaren lanak bildu eta erakusketa egin nahi dute Aramaion

Galartaren lanekin egindako beste erakusketa bat.

Pintorearen Lagunen Elkartea haren lanen inbentarioa ari da egiten; 3.000 koadrotatik, 1.500 katalogatu dituzte.

Julio Galarta Pintorearen Lagunak Elkarteak artistaren ekarpenaren inbentarioa egiteari ekin zion duela hiru urte, eta, egun, 1.500 koadro ditu katalogatuta. Baina jakin badakite oraindik asko falta zaizkiela jasotzeko: "Gure kalkuluen arabera, 3.000 lirateke Galartak margotutakoak".

Pintore arrasatearrak oso gustuko zituen Aramaioko bazterrak, eta koadro askotarako aitzakia izan zituen: "Horietako hainbat identifikatuta daude, baina badakigu jakin oraindik katalogatu ez diren asko etxe partikularretan geratzen direla". Horregatik eskatzen diete aramaioarrei Galartak margotutako koadroren bat ezagutzen badute adieraz diezaieten galartaelkartea@ gmail.com helbidera idatzita.

Koadrook katalogatzearekin batera, erakusketa egin nahi dute Aramaion, aurtengo urrian: "Erakutsiko diren margolanen izendatzaile komuna Aramaio izango da: inguruak, baserriak, kaleak, eta abar". Aramaioko Udalaren laguntza du ekimenak.

Debagoieneko albiste garrantzitsuak edo azken ordukoak telefonoan jaso gura dituzu?

  • Bidali ALTA 688 69 00 07 zenbakira Whatsapp bidez.
  • Batu zaitez Telegrameko @GoienaAlbisteak kanalera.