Aramaio Herriartekotik kanpo geratu da Guardiaren aurka 0-3 galdu ondoren. Etxean jokatu dituzten txapelketako finalerdiak; hala ere, ezin izan duten Arabako Errioxako pilotarien aurka ezer egin.
Kadete mailakoa, estua
Kadete mailako partidua izan da lehiatuena: "Partidu ona izan da, luze joan da eta gogorra izan da", azaldu du partidu amaieran Jon Herrarte entrenatzaileak. Markel Arriolabengoa eta Xabi Errasti izan dira etxeko pilotariak. Ondo eutsi dute, 20-19 ere aurreratu dira markagailuan, baina azkeneko tantoak Guardiaren aldekoak izan dira. 20-22 galdu dute partidua.
Gazte mailan, lehia polita
Gazte mailako lehia polita izan da: "Gantxo politak ikusi dira", azaldu du Herrartek. Asier del Campo eta Aimar Quintana pilotariek zuten dena eman dute baina emaitza kontra izan dute: 10-22.
"Gustura egindakoarekin"
Azkeneko lehian erraz nagusitu dira Guardiakoak: 6-22. "Kadete mailan eta gazte mailan bagenuen irabazteko esperantza, baina ezinezkoa izan da gaurkoan", dio entrenatzaileak, eta gaineratu du: "Balorazio ona egiten dugu. Txapelketako finalerdietara iritsi gara, orain arte ez da halakorik egin. Ea datorren urtean finalera iristea dugun!".