Barajuengo azpiegitura lanak egitea aurreko Foru Planerako ere eskatu zuen Udalak, baina Aldundiak ez zuen onartu, lanotarako behar adinako aurrekonturik ez zuela-eta. 2020-2021 aldirako, beraz, eskaera egingo dute berriro.
Hori, Foru Planaren azpiegituren atalerako; ekipamenduen atalean, berriz, kiroldegiaren gaineko eskaera egingo du Udalak: "Frontoiko teilatuak arazo handiak ematen ditu; duela hiruzpalau urte gastatu zen diru bat konpontzen, baina materialak ere eman du berea, eta dena aldatu behar da", zioen Hirigintza batzordeko buru Martin Arriolabengoak.
Bi eskaera eta ez hiru
Behin kiroldegian lanak egiten hasita, kanpoko pilotalekua estaltzea ere nahi du Udalak, eta hori ere eskatuko dute.
Foru Planerako hiru eskaera egiteko aukera du Aramaiok, eta gero Aldundiak aukeratuko lituzke bi. Egitekotan, egingo diren lanak Udalak lehenesten dituenak izan daitezen, bi eskari soilik egitea erabaki dute.