Aurkezpenean azpimarratu zuten, Txapelketa honekin, Arabako bertsogintzak egin duen bidea "goraipatu" nahi dutela, "eraikitako zubiek eta urteetan pausuz pauso eginiko lanak duen garrantzia goraipatuz".
Hiru zalduondarrek hartu zuten hitza. Lehengoa, Oihane Perea 2017ko txapelduna izan zen eta Txapelketari hasiera eman zion testua irakurri zuen. Ondoren, Bernardo Atxaga idazleak hartu zuen hitza eta "araba-zozoari" omen eginez Arabako euskara eta euskalduntze bidea goraipatu zituen. Azkenik, eta Txapelketari zin eginez, Oier Suarez Elkarteko sustapen arduradunak eman zituen Txapelketari buruzko xehetasunak.
Txapelketako lehenengo final laurdena otsailaren 9an jokatuko da, Araian. Eta martxoaren 30ean bukatuko da. Hiru final laurdenak, Araia, Zigoitia eta Aramaio herrietan ospatuko dira, bi finalerdiak, berriz, Legutio eta Dulantzin eta azkenik, finala Gasteizko Printzipal Antzokian.
Bertsozale Elkartekoek jakinarazi zuten Txapelketak honako egitura hau izango duela: hemezortzi bertsolari final laurdenetan, hamabi bertsolari finalerditan eta sei bertsolari finalean. Bertsolari bakoitzak behin baino ez du kantatuko fase bakoitzean.
Bestalde, gogoratuarazi zuten Arabako Bertsolari Txapelketaren jarraipena www.bertsozale.eus/araba eta www.bertsoa.eus web orrien bitartez egin daitekeela. Eta nola ez, baita Arabako Bertsozale Elkartearen sare sozialen bitartez ere.